Kryetari i Kontrollit të Lartë të Shtetit Arben Shehu prezantoi raportin vjetor në mbledhjen e përbashkët të Komisionit për Nismat Qytetare dhe Komisionit të Ekonomisë.
Ai ka listuar një sërë shkeljesh të kryera nga instucionet publike, duke u ndalur vecanërisht tek shkeljet në sektorin e shëndetësisë.
“KLSH gjatë vitit 2024 ka kryer 159 auditime në të gjitha hallkat e qeverisjes. Janë dhënë 4378 rekomandime, ku ishin 993 masa disiplinore, 66 masa administrative, 697 masa për efekte financiare. Për kontratat në shëndetësi kemi kryer veprimet, ua kemi vënë në dispozicion të Kuvendit. Ne jemi shprehur për problematikat, dhe shteti duhet të bëjë një analizë të detajuar për të rikuperuar dëmin brenda afateve të detyrueshme”, tha Shehu.
Ndërkohë nga ana tjetër deputeti i Partisë Socialiste, Erion Braçe ka propozuar një auditim 10-vjeçar të kontratave koncesionare në shëndetësi, check up dhe sterilizimi.Braçe tha se duhet një verifiki nisur nga fakti se KLSH thotë se private po merr para, pa dhënë shërbimin.
“Po lexoj nga raporti edhe për vitin 2023, kontrata koncesionare “Për ofrimin e hemodializës” , ka rezultuar me pagesa për shërbime të pakryera, konkretisht për 9241 raste nën projeksion dhe 1557 raste mbi projeksion, në shumën 103,527 mijë lekë. Këtë gjetje e kam hasur vazhdimisht në vitet, është e njëjta sjellje vit për vit. Cili është rekomandimi që i keni bërë autoritetit përkatës që monitoron këtë kontratë që ka mbaruar praktikisht? Do doja që të kishim një auditim të plotë të 10-viteve të këtyre kontratave, nga dita e parë deri në fund të këtyre kontratave, që të ndihmohet edhe MSH nëse do i zgjasë, ti lë matanë apo të vazhdojë shërbimi publik”, tha Braçe.
Ndër të tjera Kreu i KLSH-së the sa institucionet qendrore e vendore vijojnë me problemin e largimeve të padrejta nga puna të punonjësve. Për të gjitha shkeljet e identifikuara janë bërë 13 kallëzime penale./vizionplus.tv