Kreu i qeverisë shqiptare, Edi Rama ndodhet në Berlin. Shefi i qeverisë po merr pjesë në forumin e ‘Berlin Global Dialogue’, aktivitet që zhvillohet çdo vit në kryeqytetin gjerman me fokus sfidat globale të ekonomisë, klimës, teknologjisë dhe qeverisjes.
Rama është i ftuar së bashku me presidenten e Komisionit Europian, Ursula von del Leyen, dy folësit e sesionit përmbyllës të forumit.
Në seancën “Zgjidhje përmbysëse për kohë të trazuara”, kreu i qeverisë tha se gjatë 11 muajve të fundit Shqipëria ka çeluar 5 nga 6 kapitujt me BE-në dhe pret të çelë kapitullin e fundit deri në dhjetor, gjë që do të shënonte një rekord.
Rama: Në këtë momet Evropa është plotësisht e zgjuar. Për fat të keq për të pasur një zgjim të tillë duhej agresioni i tmerrshëm kundër Ukrainës, por tani mund të shohim një dallim të madh. Më parë BE thjesht thoshte që Ballkani Perëndimor është i rëndësishëm. Por vetëm me fjalë. Tani edhe veprat tregojnë se ka një angazhim për të na sjellë më pranë.
Duke vijuar, Rama u shpreh se Bashkimi Evropian është i vetmi realitet gjeopolitik me “dy kufij”, një të jashtëm dhe një të brendshëm, brenda të cilit ndodhet edhe Ballkani Perëndimor.
Ai theksoi se hezitimi për t’u bashkuar me këtë pjesë të kontinentit është një ide e gabuar, pasi BE-ja ka po aq nevojë për Ballkanin sa ky i fundit për të.
Rama: Në historinë e hartave, BE është i vetmi realitet gjeografik dhe gjeopolitik që ka dy kufij. Zakonisht çdo subjekt ka një kufi, atë të jashtim. BE-ja ka dy kufij, një të jashtëm dhe një të brendshëm dhe brenda perimetrit të kufirit të brendshëm jemi ne. Një njëfarë mënyrë jemi kërthiza e BE-së. Hezitimi për t’u bashkuar me këtë pjesë është një ide jo e mirë. Unë besoj që për të gjitha ato aryse të mira është BE-ja që ka nevojë për Ballkanin Perëndimor, po aq sa kemi ne nevojë për BE-në.