Një grabitje spektakolare ndodhi në orët e para të mëngjesit në Muzeun e Luvrit në Paris, ku tre persona vodhën në vetëm 7 minuta nëntë bizhuteri me vlerë të pallogaritshme nga koleksioni i Napoleonit dhe Perandoreshës Eugenia.
Sipas “Le Parisien”, grabitësit mbërritën me dy motorë dhe hynë në muze nga një pjesë ku po kryheshin punime, pranë brigjeve të Senës. Ata përdorën një vinç për të hyrë direkt në katin e parë, në Galerinë e Apolonit – vendi ku ruhen bizhuteri të rralla dhe objekte të trashëgimisë perandorake.
Të pajisur me një sharrë elektrike, ata thyen xhamat dhe dy prej tyre hynë në muze, ndërsa i treti qëndroi jashtë për të mbikëqyrur. Ata grabitën objekte të çmuara si kurora, gjerdanë dhe byzylykë nga Galeria e Napoleonit dhe ajo e sundimtarëve francezë.
Fatmirësisht, diamanti i famshëm “Régent”, më i madhi i koleksionit me mbi 140 karatë, nuk ishte në mesin e objekteve të vjedhura. Ky diamant njihet edhe si “i mallkuar”, pasi shumë nga pronarët e tij kanë pasur fund tragjik.
Prokuroria e Parisit ka hapur një hetim për “vjedhje të organizuar” dhe e ka deleguar çështjen Njësisë Speciale për Luftimin e Krimit të Organizuar (BRB). Deri më tani, një nga sendet e vjedhura është gjetur jashtë muzeut bëhet fjalë për kurorën e Perandoreshës Eugenia, e cila është dëmtuar dhe dyshohet se u braktis gjatë arratisjes.
Ministri i Brendshëm francez, Laurent Nuñez, deklaroi se plani ishte i mirëorganizuar dhe u realizua me saktësi brenda 7 minutash. Në vendngjarje mbërriti menjëherë edhe ministrja e Kulturës, Rachida Dati, ndërsa muzeu u mbyll për publikun.
Vizitorët e tronditur përshkruan skena konfuzioni dhe kaosi ndërsa përhapej lajmi për grabitjen.
“Për rreth gjysmë ore kishte sirena që binin rreth e qark ndërtesës dhe askush nuk e dinte se çfarë po ndodhte. Padyshim që i shton pak dramë festës për të cilën mund t’u tregojmë njerëzve në të ardhmen”, tha dikush.
Një tjetër vizitor britanik, 38 vjeç, shtoi: “Ishte shumë emocionuese të ishe në vendngjarje kur ndodhi drama, si diçka nga Kodi Da Vinçi!”
/vizionplus.tv