Në një konferencë për media, kreu i OVL – UÇK-së, Hysni Gucati, ka dhënë më shumë detaje rreth organizimit të protestës që do të mbahet të premten në Tiranë, në kërkim të drejtësisë për ish-krerët e UÇK-së që po gjykohen në Hagë.
Gucati tha se është konfirmuar se në protestë do të marrë pjesë edhe kryeministri i Shqipërisë, Edi Rama, ndërsa fjalë rasti do të ketë ish-presidenti shqiptar Alfred Moisiu dhe kryetari i BDI-së, Ali Ahmeti.
“Do të jetë ish-presidenti i Shqipërisë, Alfred Moisiu do të marrë fjalën. Kryetari i BDI-së, Ali Ahmeti do ta marrë fjalën dhe unë si organizator i protestës në Tiranë. E kemi të konfirmuar se kryeministri Edi Rama do të marrë pjesë në protestë. Jemi duke pritur që sot ose nesër të na njoftoj edhe për fjalim. Nuk besoj se do e refuzoj fjalimin, e gjitha varet nga agjenda e tij, por mbrëmë na ka thënë se do të marrë pjesë në protestën e 17 tetorit”, ka deklaruar Gucati.
Kryetari i OVL-UÇK-së deklaroi se mbi 60 autobusë do të nisen nga Kosova drejt Tiranës të premten dhe se për këtë kanë marrë mbështetje edhe nga institucionet e Shqipërisë.
“Na kanë dalë në mbështetje edhe tifozët “Kuq e Zi” në Shqipëri. Vetëm nga Kosova deri më sot i kemi 60 autobusë të konfirmuar nga tri shoqatat tona; e invalidëve, e dëshmorëve dhe veteranëve që ne jemi duke e organizuar. Falënderojmë kryetarët e komunave që na e kanë mundësuar transportin sepse ne nuk kemi pasur mjete tona”, ka deklaruar Gucati.
Protesta do të mbahet në sheshin “Skënderbeun” në Tiranë, derisa ky organizim vjen pas atij në Hagë, ku me mijëra qytetarë kanë kërkuar lirimin e ish-krerëve të UÇK-së – Hashim Thaçit, Kadri Veselit, Jakup Krasniqit dhe Rexhep Selimit – të cilët ndodhen në paraburgim që nga nëntori i vitit 2020.