Kandidati i VLEN-it për kryetar të Komunës së Kërçovës, Fatmir Limani, gjatë takimit me mërgatën kërçovare ka vlerësuar lart rolin e tyre si “zemra dhe shtylla e fortë e vendlindjes”. Ai tha se mërgata është oksigjeni i kombit dhe bekimi i Kërçovës, duke theksuar rëndësinë e mobilizimit për mbështetjen e ndryshimeve të domosdoshme në këtë komunë.
“Kurbeti ngjan si mallkim, por ju e keni bërë bekimin tonë kombëtar. Prandaj ne si qeveritarë, si kryetarë komune, duhet t’ju shohim si të bekuarit tanë dhe si vendimmarrës”, tha Limani, duke premtuar krijimin e kushteve që rinia të kthehet apo të lidhet pazgjidhshmërisht me vendlindjen.
Ai shtoi se programi i tij përfshin instrumente konkrete për përfshirjen e mërgatës në qeverisje dhe projekte për rininë, ekonominë, si dhe bonuse, grante e nisma zhvillimore.
“Na duhet të bashkëpunojmë me njëri-tjetrin, me qeverinë, por edhe me vëllezërit tanë të opozitës. Rotacioni është i shëndetshëm, si jeta që zhvillohet me cikle. Askush nuk humb, të gjithë fitojnë”, theksoi kandidati i VLEN-it.
Limani premtoi se do të qëndrojë njeri i fjalës së dhënë dhe të mbajtur për të gjitha projektet, duke ftuar mërgatën të bëhen pjesë e një “Kontrate të Besës” mes tij dhe qytetarëve:
“Më jepni votën, unë ju jap Kërcovën e dekadës së re. Kërcovën e rotacionit, ndryshimit, Kërcovën lule që i prin shoqeve të veta”, përfundoi ai. (INA)