Një ngjarje e rëndë ka ndodhur në Xhenova të Italisë, ku një 30-vjeçare me origjinë nga Peruja humbi jetën pasi ra nga ballkoni i katit të gjashtë të pallatit ku banonte, në lagjen San Martino.
Viktima është identifikuar si Evelinndel Moori Chamorro, e cila sipas mediave italiane, pak para rënies kishte debatuar ashpër me partnerin e saj. Rrethanat e ngjarjes mbeten ende të paqarta, ndërsa policia po heton si pistën e vetëvrasjes, ashtu edhe mundësinë që ajo të jetë shtyrë nga partneri.
Dyshimet për një vrasje janë shtuar pas rezultateve të autopsisë. Hetuesit kanë konstatuar se në trupin e viktimës kishte fraktura dhe hematoma që nuk lidhen vetëm me rënien, por edhe me dhunë të ushtruar më herët. Konkretisht, Chamorro kishte këmbën e thyer, disa brinjë të dëmtuara dhe shenja të tjera goditjesh në pjesë të ndryshme të trupit.
Nëna e 30-vjeçares, duke folur për mediat italiane, hodhi poshtë mundësinë e vetëvrasjes duke e akuzuar partnerin e së bijës si person të papërgjegjshëm dhe konfliktual.
“Vajza ime nuk e kreu vetëvrasje. Ajo ishte e vetmja që sillte para në shtëpi, punëtore e palodhur dhe e sjellshme. Partneri i saj i shpenzonte paratë e saj për argëtimet e veta dhe nuk kujdesej për familjen. Ata grindeshin shpesh, edhe për shkak se ai nuk tregonte asnjë përkushtim ndaj vajzave të tyre”, u shpreh ajo.