Kur të gjithë thonë “jo” ndaj transparencës në dritë, është detyrë e jona të mos bëhemi pjesë e marrëveshjeve në errësirë.
Ne nuk kemi asgjë për të fshehur, dhe për këtë arsye nuk frikësohemi nga përballja me popullin. Përkundrazi, aty e shohim burimin e vërtetë të legjitimitetit tonë.
Duke ndjekur këtë parim, Aleanca për Shqiptarët propozon një qasje të re, të hapur dhe demokratike: lista të veçanta, që secila parti të ketë hapësirën e vet për t’u prezantuar para qytetarëve, ndërsa për kandidatët për kryetarë komunash, të gjithë bashkë të angazhohemi për të zgjedhur më të mirët prej nesh. Pse? Sepse komunat tona nuk kanë nevojë për militantë të emëruar, por për udhëheqës të zotë, vizionarë, të ndershëm dhe njerëz që i shërbejnë qytetarëve, jo vetëm partive.
Ky model nuk përjashton bashkëpunimin, përkundrazi, e bën atë më të drejtë, më të sinqertë dhe më të dobishëm për qytetarët. Aleanca nuk kërkon ndarje, por barazi dhe respekt. Dhe nëse këto vlera nuk gjejnë vend në një marrëveshje të përbashkët, atëherë jemi të detyruar të ecim të vetëm, por me kokën lart dhe me qytetarët përballë.
Ne nuk konkurrojmë për të mposhtur partnerët, por për të fituar besimin e njerëzve. Egoja ndan, ndërsa e vërteta bashkon. Aleanca për Shqiptarët zgjedh të qëndrojë në anën e së vërtetës. Dhe siç thotë një fjalë e urtë: “Kush nuk ka çka të fshehë, nuk frikësohet nga drita.”
Ne do të ecim në dritë. Jo për të treguar superioritet, por për të dëshmuar sinqeritet. Dhe do të vazhdojmë ta bëjmë këtë me përkushtim, maturi dhe bindje të thellë se qytetari meriton më shumë.
Aleanca për Shqiptarët do të qëndrojë e vetme në formë, deri në fund e sinqertë, me qytetarët në zemër.