Kandidati për kryeministër nga Lidhja Demokratike e Kosovës (LDK), Lumir Abdixhiku, ka mbajtur një tubim me qytetarët e Podujevës, ku shprehu bindjen e tij për lidhjen e ngushtë mes kësaj ane dhe partisë që ai përfaqëson.
Duke iu përgjigjur kritikave, Abdixhiku tha se fryma e panikut e krijuar nga pushteti aktual nuk do të ndikojë në përkrahjen që LDK-ja gëzon në rajonin e Llapit.
“Gjithë atyre që fryma e panikut u ka humbur kontrollin – u përgjigjemi sot këtu, nga shkolla “Ibrahim Rugova”, në ditën e përjetësisë së Ibrahim Rugovës, u përgjigjemi qartë, u përgjigjemi thjesht: O të mjerë, Llapi është LDK, LDK-ja është Llap përherë”,
Tubimi në Podujevë ishte pjesë e fushatës, për të cilin gjatë së martës Abdixhiku ka shkruar edhe në Facebook.
“Madhështore! Kështu u mblodh një nëndegë e Llapit!
Një nëndegë pra! Në qytet, në shkollën ‘Ibrahim Rugova’, u prita nga mijëra rugovistë e qytetarë që duan ndryshimin!
Ishte e papërshkrueshme, ishte flakë, tjetër nivel! Siç di veç Llapi të na presë!
Shihemi të tubimin qendror në shkurt! S’kemi parë gjë akoma!”, ka shkruar Abdixhiku në Facebook.
