Ish-kryetari i Kuvendit, Jakup Krasniqi ka mbërritur në Kosovë të enjten, kështu ka bërë të ditur Gjykata Speciale.
Ai ka udhëtuar nga Holanda në Prishtinë për të qenë afër familjarëve pas vdekjes së vëllait.
Në njoftimin e Speciales thuhet se Krasniqit iu lejua vizita në Kosovë “për shkak të arsyeve bindëse humanitare”.
“Për arsye humanitare bindëse, Trupi Gjykues ka udhëzuar Zyrën Administrative që të menaxhojë një vizitë nën mbikëqyrje të z. Krasniqi në Kosovë për të takuar familjen e ngushtë. I akuzuari mbetet në paraburgim të Dhomave të Specializuara. EULEX dhe Policia e Kosovës po mbështesin Dhomat e Specializuara të Kosovës”, thuhet në njoftim.
Ndërsa, nuk dihet se sa ditë do të qëndrojë.
Krasniqi së bashku me ish-presidentin Hashim Thaçi, ish-kryekuvendarin Kadri Veseli e ish-deputetin Rexhep Selimi janë pjesë e një aktakuze të përbashkët për krime lufte e po gjykohen në Hagë nga Gjykata Speciale.