Kryeministri i Kosovës, Albin Kurti, ka komentuar aksionin e Prokurorisë Speciale në Ministrinë e Mjedisit, Planifikimit Hapësinor dhe Infrastrukturës, ku u arrestua Izedin Bytyqi, sekretari i Përgjithshëm i këtij institucioni.
Në një konferencë për media, Kurti theksoi se ministria nuk është pronë e ministrit Liburn Aliu, por një institucion që operon në kuadër të Qeverisë së Kosovës, dhe se të gjithë ata që punojnë aty janë shërbëtorë të qytetarëve.
”Ministria nuk është e Liburn Aliut, ai është vet ministër në Ministrinë e Mjedisit, Planifikimit Hapësinor dhe Infrastrukturës, ministria është në kuadër të Qeverisë së Kosovës, që të gjithë ne do të thotë jemi këtu punëtorë, nuk jemi pronar asnjëri, jemi shërbyes. Fjala ministër vjen nga latinishtja që do të thotë shërbëtor, prandaj s’jemi pronar, ministria e këtij apo e atij. Kjo nuk është dashtë të jetë asnjëherë, por ndoshta për shkak të së kaluarës edhe ashtu është dukur, edhe ashtu janë sjellë e kanë ngelur këto keqkuptime”, ka thënë Kurti.
Kurti njoftoi se nuk kishte informacion në lidhje me arsyet e arrestimit të Bytyqit, por shprehu besimin se drejtësia do të veprojë siç duhet.
“Personi i parë i arrestuar është një zyrtar që punon në institucionet e shtetit të Kosovës prej dy dekadash nuk kam informacion për çka janë hetuar, e arrestuar dhe përndjekur, nuk e di këtë gjë. Unë besoj se gjithçka do të sqarohet se drejtësia do të veprojë, nuk mundem në kushtet kur mungon informacione kur mungon informacioni përveç imazheve që shfaqen në mediat tona, të jap gjykime përmbajtjesore”, ka thënë Kurti.
Ndërkohë pas bastisjes gjatë së martës, Prokuroria Speciale ka njoftuar se Bytyqi, i cili edhe u arrestua, dyshohet për “Keqpërdorim të detyrës” dhe “Armëmbajtje pa leje”, teksa ushtruesi i detyrës së Udhëheqësit të Autoritetit të Rajonit të Pellgjeve Lumore, Naser Hafizi është nën hetim për veprat penale të “Keqpërdorimit të detyrës apo autoritetit zyrtar,” “Shpëlarjes së parave” dhe “Mosraportimit apo raportimit të rremë të pasurisë, të ardhurave, dhuratave dhe detyrimeve financiare”.