Kryeministri i Kosovës, Albin Kurti, ka bërë të ditur se pas dy vjet e gjysmë negociatash intensive, Kosova ka arritur një marrëveshje historike të Tregtisë së Lirë me vendet anëtare të EFTA-s – Norvegjinë, Zvicrën, Lihtenshtajnin dhe Islandën.
Sipas tij, kjo marrëveshje, e cila përfshin jo vetëm tregtinë e mallrave, por edhe tregtinë e shërbimeve, është e para e këtij lloji në rajon për Kosovën.
“Jemi i vetmi vend në rajon që përveç tregtisë së mallrave, ka negociuar edhe për tregtinë e shërbimeve me EFTA-n,” ka shkruar Kurti në Facebook.
Ai ka theksuar se nënshkrimi i marrëveshjes pritet në fillim të vitit të ardhshëm dhe do të sjellë mundësi të reja për prodhuesit dhe bizneset vendore.
Marrëveshja, siç ka thënë ai, që ka për qëllim forcimin e lidhjeve ekonomike dhe tregtare, vjen pas katër raunde negociatash që u lansuan në qershor të vitit 2022, duke përfaqësuar një hap të madh për Kosovën në arenën ndërkombëtare.