Shefi i Njësisë së Veçantë të Hetimeve në Policinë e Kosovës, (ish Task- Forca), Shemsi Haziri është shkarkuar nga pozita e tij më 08.07.2024.
Departamenti brenda Policisë së Kosovës që udhëhiqej nga Shemsi Haziri ka hetuar rastin e kryeshefit tashmë të suspenduar të KEK-ut, Nagip Krasniqit, i cili u arrestua me urdhër të Prokurorisë Speciale të Kosovës nën dyshimin se ka kryer veprat penale: Keqpërdorimi i pozitës apo autoritetit zyrtar; ushtrimi i ndikimit, dhe konflikti i interesit.
Për këtë shkarkim është pyetur ministri i Punëve të Brendshme, Xhelal Sveçla gjatë një interviste në “Kallxo Përnime”.
Ministri mohoi që Haziri është larguar nga pozita e tij për shkak se hetoi Nagip Krasniqin e Martin Berishaj.
“Absolutisht jo, absolutisht jo, s’bëhet llaf” – u shpreh i pari i MPB-së.
“Në Policinë e Kosovës ka ndërrime të vazhdueshme” – tha tutje ai.
Ministri tha se ka shumë raste kur nuk është në dijeni me të gjitha veprimet e operacionet që bën Policia.
Pas shkarkimit të Hazirit, Përparim Gruda nga Partia Demokratike e Kosovës kishte thënë se shkarkimi i drejtorit të Njësisë së Veçantë të Hetimeve në Policinë e Kosovës është politik.
Sipas PDK-së, shkarkimi ka të bëjë me ambasadorin Martin Berishaj, si dhe drejtorin e pezulluar të KEK-ut, Nagip Krasniqi.