Për disa ditë VMRO-DPMNE duhet të konfirmojë kandidatët për Qeverinë teknike por ende nuk dihet kur do të kumtohen edhe zyrtarisht. Kryetari i VMRO-DPMNE-së, Hristijan Mickoski, tha se të enjten do të ketë seancë të Komitetit qendrorë dhe ekzekutiv, ku duhet të vërtetohen emrat e kuadrove në Qeverinë e Përzhinos. VMRO-DPMNE duhet të delegojë dy ministra dhe tre zëvendësministra. Tashmë spekulohet se një pjesë e kandidatëve që do të propozohen janë të njëjtët nga Qeveria paraprake teknike, përkatësisht për punë të brendshme do të propozohet Naqe Çulev, ndërsa si zëvendës shtesë në Ministrinë e bujqësisë përsëri do të jetë Cvetan Tripunovski. Nga VMRO DPMNE përsëritën qëndrimin të cilin dje e tha Mickoski, por me kritika rreth takimit të paralajmëruar mes liderëve të DPMNE-së dhe LSDM-së.
Numërohen ditët deri në qeverinë teknike, më 16 janar pritet dorëheqja e Kovaçevskit
“Ende nuk ka asnjë ftesë, nuk ka asnjë kontakt. Është e qartë se BDI dhe LSD kanë prioritet që të punësojnë mbi 200 persona në institucionet publike, kanë prioritet të hyjnë të padënuar në institucione, ta plaçkitin shtetin, në vend që të organizojnë zgjedhje, të ketë takim të liderëve dhe të ketë një gjendje normale në shtet”, tha Naum Stoillkovski, zëdhënës i VMRO-DPMNE-së.
Në krye të qeverisë teknike do të jetë Talat Xhaferi, ndërsa koordinatori i grupit të deputetëve të LSDM-së, Jovan Mitrevski do ta zëvendësojë Talat Xhaferin në postin e tij. Nga LSDM tashmë i publikuan emrat e kuadrove të tyre. Një pjesë prej tyre mbeten të njëjtët, përveç Mitko Bojmacaliev të cilin do ta propozojnë për zëvendësministër shtesë të punëve të brendshme, ndërsa në Ministrinë për punë dhe politikë sociale mbetet ministrja aktuale Jovana Trençevska. Paraprakisht, kryeministri Kovaçevski duhet ta deponojë dorëheqjen e tij që me shumë gjasa do të ndodhë në seancën në Kuvend që është caktuar për më 16 janar. Për takimin me Mickoskin, Kovaçevski tha se i njëjti do të mbahet pas festave.
“Unë nuk po shoh se ka nevojë që të mbajmë takime të fshehta, kështu që, takimi do të mbahet në hapësirë publike, qoftë në Klubin e deputetëve, në Kuvend, në rrugën Maqedonia, ose në një kafe bar. Do të shohim kur të merremi vesh, ne kemi komunikim në nivel partiak. Nënkryetari i VMRO-DPMNE-së është në komunikim të vazhdueshëm me nënkryetaren e LSDM-së”, deklaroi Dimitar Kovaçevski, kryeministër.
Sa u përket zgjedhjeve, mbetet e hapur çështja për plotësimin e vendit të zbrazët në KSHZ. Opozita shqiptare paralajmëroi se nëse nuk zgjidhet anëtar nga radhët e tyre, do ta braktisin Kuvendin ndërsa paralajmëruan edhe protesta.