Fibromialgjia është një çrregullim kronik i dhimbjes që karakterizohet nga dhimbje të përsëritura së bashku me simptoma të tjera, të tilla si shqetësime të gjumit, humor depresiv, lodhje kronike dhe probleme me tretjen
. Çfarë e shkakton atë mbetet kryesisht e panjohur, duke e bërë të vështirë trajtimin. Dhimbja del dhe jashtë kontrollit për njerëzit me fibromialgji. Por pse? Më në fund, studiuesit nga Universiteti Ruhr në Bochum, Gjermani, e kanë zbuluar këtë mister.
Ekipi hulumtues në Klinikën për Mjekësi Psikosomatike dhe Psikoterapi i udhëhequr nga profesor Martin Diers, zbuloi se disa zona në tru që janë të përfshira në përpunimin e dhimbjes nuk funksionojnë normalisht te pacientët me fibromialgji. Kjo e bën dhimbjen jashtë kontrollit të tyre dhe e bën të vështirë për t’u duruar.
Tek njerëzit e shëndetshëm, këto zona të trurit sigurojnë që dhimbja që ne mund të kontrollojmë është më e lehtë për t’u përballuar. Tek ata me fibromialgji, aktiviteti i këtyre zonave të trurit ndërpritet. Gjetjet e studimit të tyre u raportuan në revistën NeuroImage: Clinical.
Kuptimi i mekanizmave nervorë pas Fibromialgjisë
Mënyra se si ne e perceptojmë dhimbjen, përcakton shkallën e dhimbjes që përjetojmë, si dhe kufizimin e shkaktuar prej saj. Njerëzit e shëndetshëm kanë ndjenjën se mund ta kontrollojnë dhimbjen, gjë që i bën ata të tolerojnë më mirë dhimbjen. Pacientët me fibromialgji, nuk kanë aftësinë për të kontrolluar sulmet e përsëritura të dhimbjes. Deri më tani, mekanizmat nervorë themelorë pas tij ishin të paqartë.
Në studimin e tyre, Martin Diers dhe ekipi i tij krahasuan aktivitetet e trurit të pjesëmarrësve të shëndetshëm dhe pacientëve me fibromialgji (të gjitha gratë) ndërsa ato ishin të ekspozuar ndaj dhimbjes së nxehtësisë. Ata përdorën imazhe funksionale të rezonancës magnetike për të monitoruar aktivitetet e trurit të tyre.
Kur pjesëmarrësit e shëndetshëm përfunduan vetë stimulimin e dhimbjes, shumë zona frontale të trurit u aktivizuan, të cilat duket se janë të përfshira në modulimin e dhimbjes. Megjithatë, asnjë aktivizim i tillë nuk u zbulua në pacientët me fibromialgji.
Disa fakte rreth Fibromialgjisë që duhet të dini
-Organizata Botërore e Shëndetësisë (OBSH) shtoi Fibromialgjinë në katalogun e saj në 1994.
-Shumica e pacientëve me Fibromialgji janë gra, por çdokush mund të vuajë nga ajo.
-Fibromialgjia mund të prekë njerëzit e çdo moshe, përfshirë fëmijët, por rreziku rritet me rritjen e moshës, zakonisht duke filluar nga mosha e mesme.
-Njerëzit me sëmundje reumatizmale, çrregullime të humorit (depresioni ose ankthi, lupusi, sindroma e zorrës së irrituar ose gjendjet që shkaktojnë dhimbje, kanë më shumë gjasa të kenë këtë çrregullim.
-Fibromialgjia mund të shfaqet në familje, por njerëzit pa histori familjare të çrregullimit gjithashtu mund ta zhvillojnë atë.
-Fibromialgjia nuk mund të shërohet, por trajtimi mund të ndihmojë në menaxhimin e simptomave.
-Zakonisht trajtohet me një kombinim ushtrimesh, terapi psikologjike dhe të sjelljes dhe medikamente.
Fibromialgjia mund të ngatërrohet me osteoartritin, bursitin dhe tendinitin. Nëse vuani nga Fibromialgjia, ju do të përjetoni dhimbje dhe ngurtësi në të gjithë trupin tuaj, dhe jo në një zonë të caktuar. Dhimbja mund të qëndrojë për muaj të tërë. Së bashku me dhimbjen e vazhdueshme të shurdhër, ju mund të përjetoni edhe probleme të tretjes si dhimbje barku, fryrje, ankth, kapsllëk dhe diarre (sindromi i zorrës së irrituar); dhimbje koke; ndjeshmëri ndaj të ftohtit, nxehtësisë, dritës ose zërit; lodhje; problemet e gjumit, depresion dhe ankth.
Top Channel