Deputeti demokrat Edi Paloka sulmoi ambasadoren amerikane në vendin tonë Yuri Kim.
Ditën e djeshme, Kim në një intervistë për VOA ka thënë se “non gratat” nuk duhet të përfaqësojnë popullin, ndërsa theksin e vuri tek mbajtja e zgjedhjeve të lira.
Paloka, në përgjigjen e tij gjatë një intervistë dhene për emisionin 7pa5 në Vizion Plus, tha se ambasadorja Kim është paguar që ditën e parë që ka ardhur nga Rama për ta mbështetur atë në çdo gjë, ndërsa deklaratat e saj ai i ka cilësuar si retorika normale për të marrë këstin e fundit të pagesës.
Sipas Palokës, qëllimi i Ramës dhe diplomatëve të huaj që paguheshin prej tij ishte eliminimi i opozitës, por nuk ja kanë arritur dot qëllimit.
Deputeti thotë se edhe në ditët në vijim pritet të ketë të tjera deklarata nga ambasadorja, ndërsa shton se demokratët janë përditë në beteja për të rrëzuar Ramën nga pushteti.
“Në 2021 thamë 1000 gjëra dhe ikëm e shkatërruam PD. Këtë herë nuk do lejojmë me të gjitha mënyrat që të vendoset rezultati i zgjedhjeve nga presione qeveritare dhe para mafie dhe inceneratorësh. Ata që do e bëjnë do japin edhe llogari për këtë.
Reagimin e kanë bërë demokratët dhe shqiptarët që para një viti. E kanë marrë përgjigjen zonja McGonigal e të gjithë që i shërbejnë Ramës.Ata kishin si qëllim eliminimin e opozitës. Por ajo fazë ka kaluar. Demokratët janë përditë në betejë me Edi Ramën për të çuar në shtëpi Ramën dhe veglat e tij.
Zonja pret këstin e fundit, se këtë ka bërë që ditën e parë që ka ardhur është vënë në shërbim të Ramës sepse merr diçka. Skandali McGonigal e bëri të qartë se si funksionojnë këto gjëra. Do ketë prapë mbështetje për Ramën që zonja të meritojë këstin e fundit”, tha Paloka.
Ambasadorja Kim tha dje se është përgjegjësia e qeverisë dhe e udhëheqësve politikë, që të sigurohen për të kuptuar dhe për t’iu përgjigjur shqetësimeve që janë shprehur nga ODIHR-i në lidhje me zgjedhjet e kaluara.