TV News
Rajon-Botë

Aktivisti për edukim të vajzave arrestohet në Kabul, OKB kërkon sqarime nga Afganistani

Kombet e Bashkuara kanë thënë të martën se një aktivist për edukimin e vajzave është arrestuar këtë javë në Kabul, si dhe u kanë bërë thirrje talibanëve që të sqarojnë arsyen e ndalimit të tij.

 

As zëdhënësit e Ministrisë së talibanëve për Informacion dhe as ata të agjencisë së inteligjencës, nuk u janë përgjigjur kërkesave për të komentuar apo konfirmuar ndalimin.

 

“Matiullah Wesa, udhëheqës i (Pen Path) dhe mbrojtës i të drejtës së grave për edukim, është arrestuar të hënën në Kabul”, ka thënë Misioni i OKB-së në Afganistan (UNAMA) përmes një deklarate.

 

“UNAMA u bën thirrje autoriteteve de facto që të japin detaje për vendndodhjen e tij, arsyet e arrestimit dhe t’i sigurojnë atij përfaqësim ligjor dhe kontakt me familjen”.

 

Wesa ka vite që mbron të drejtën e grave për edukim, sidomos në zonat më konservatore.

 

Organizata e tij, Pen Path, ka mbajtur disa takime me pleqtë e fiseve dhe i ka inkurajuar komunitetet dhe autoritetet që të hapin shkolla.

 

Administrata e talibanëve ua ka ndaluar edukimin shumicës së grave.

 

Ato mund të vijojnë vetëm shkollimin fillor, por jo edhe atë të mesëm apo universitar.

 

Zyrtarët kanë thënë se janë duke punuar në rihapje të shkollave, mirëpo pa dhënë afate kohore kur mund të ndodhë diçka e tillë./REL/

Lajme të ngjashme

Bursa e Turqisë goditet nga një tërmet 5.1 ballë, u ndje edhe në Stamboll – një tjetër dridhje toke u regjistrua tre minuta më vonë

Suad Avdiu

Anulohen dhjetëra fluturime në Holandë, kjo është arsyeja

Suad Avdiu

Si pasojë e defektit teknik, sistemi i mbrojtjes kundërajrore izraelite nuk funksion – raketa rikthehet dhe bie në tokë në Tel Aviv

Suad Avdiu