Kryetari i Lidhjes Demokratike të Kosovës (LDK), Lumir Abdixhiku, ka vizituar minatorët e Trepçës, për të cilët tha se punojnë në kushte jo vetëm të rënda të punës, por antihumane.
Abdixhiku përmes një postimi në Facebook e ka akuzuar Qeverinë aktuale për populizëm, fati i të cilëve thotë se është i shkurtër për dallim nga “terri i ndershëm i minatorëve”.
“Vizitova dhe pashë kushtet – jo vetëm të rënda të punës, por antihumane. Aq antihumane, sa nuk i besoni pa i parë vetë aty! Por sot kushtet, pajisjet primitive, që datonin, besoni ose jo, që nga viti 1919, sot janë në rend të dytë”, ka shkruar ai.
Ai ka shtuar se është përgjegjësi e shtetit që punëtorët e vet t’i kompensojë për punën dhe kontratën që kanë.
“Minatorët, në përballje me populistë, rrezikohen të quhen dhe tradhtarë. Deputetë e pushtetarë, që këtë muaj tashmë i kanë marrë pagat nga 2000 euro, nuk do të përtojnë që mesazhet e gatshme nga ‘Politbyroja e Tiranës’ t’i drejtojnë nga Minatorët. Siç kanë bërë më çdo vlerë në këtë vend, me aleat, mësues, mjek, patriot e atdhetarë, luftëtarë e veprimtarë, dhe minatorët kanë të njëjtin fat. Fati i populistëve është i shkurtër megjithatë. Dhe për dallim nga terri i ndershëm i minatorëve, aty ku këta burra plakin një të tretën e jetës, terri i përfundimit populist do të jetë i padenjë. Sepse Kosova është më e fortë se kaq. Populli i Kosovës është më i mençur se çfarë populistët ndarës e përçarës kanë në mend”, ka shkruar Abdixhiku./21Media