Një vajzë 11-vjeçe nga Rripi i Gazës ka arritur të fitojë vëmendjen e shumë mediave botërore për një veprim që ajo po e bën, dhe shumëkënd po e habit me guximin.
Bëhet fjalë për Sumayya Wushah, një prej gazetareve më të reja në moshë që vepron në Gazë dhe raporton për palestinezët.
Gjatë një interviste të dhënë për Al Jazeera, kjo vajzë e re ka bërë të ditur se nuk frikësohet të raportojë nga qyteti i shkatërruar nga lufta në Rripin e Gazës.
Në këtë qytet që nga fillimi i luftës më 7 tetor mes Hamasit dhe ushtrisë izraelite, janë vrarë mbi 100 gazetarë, por kjo nuk e dekurajoi fare palestinezen e re.
Ajo theksoi se nëna dhe babai fillimisht ishin kundër idesë dhe vendimit të saj që të raportojë për luftën, duke ditur se gazetarët ishin cak i sulmeve.
Megjithatë kur panë këmbëngulësinë dhe vendosmërinë e saj që të kryejë këtë punë, ata u pajtuan dhe e mbështetën në çdo veprim.
Për punën thotë se është frymëzuar nga gazetarja e televizionit Al Jazeera, Shireen Abu Akleh, veterania e gazetarisë që u vra nga forcat izraelite në Jenin.
11-vjeçarja edhe para luftës në Rripin e Gazës kishte ëndërruar që një ditë të bëhet gazetare, dhe të shfaqet para ekraneve televizive.