Majlinda Bregu është rikthyer në ambientet e Kuvendit të Shqipërisë, 6 vjet pasi mbaroi mandatin e deputetes, këtë herë me cilësinë e sekretares së përgjithshme të këshillit të bashkëpunimit rajonal.
Në fokus të takimit të sotëm është procesi i Berlinit dhe tregu i përbashkët rajonal.
MAJLINDA BREGU
SEKRETARE E PERGJITHSHME E KESHILLIT PER BASHKEPUNIMIN RAJONAL
“Në fakt, procesi i Berlinit ka nisur në 2014, kur unë isha kryetare e Komisionit të Integrimit dhe vazhdon pavarësisht se çfarë fati ka karriera e secilit prej nesh. Por duke qenë se institucioni që unë drejtoj është një nga institucionet kyç për menaxhimin e axhendës në procesin e Berlinit, më vjen mirë që u riktheva.”
Por edhe pse ka një detyrë tjetër, Majlinda Bregu mbetet një prej figurave më të rëndësishme të Partisë Demokratike, një parti e cila sot ndodhet në krizë.
“Nuk e di, nëse më pyet që jam e habitur, jam e tronditur apo jam e përgatitur; unë të them që isha e përgatitur. Sepse të paktën në momentin që unë jam larguar, jo me dëshirën time nga Partia Demokratike, fatkeqësisht leximi se çfarë do të vinte më pas ishte shumë i qartë. Dhe ju më mbani mend shumë mirë se kemi qenë bashkë të gjithë në ato kohë kur frika më e madhe ishte që partia do të kalonte në proces vetëshkatërrimi, gjë që ka ndodhur sot.
Kështu që se një ditë mali sapo mbarset pjell një mi, apo në ditën tjetër ka një ngjyrim më të madh, në fund të ditës rezultati është fatkeqësisht ky që shihni të gjithë.”
Sipas Bregut, PD ka nevojë të ndryshojë rrënjësisht dhe logoja nuk të bën asnjëherë kryetar.
“Deri diku besoja se ai shembulli i keq i dhënë në momentin kur Lulzim Basha mori një parti dhuratë dhe nuk diti ta menaxhonte, përveçse e shkatërroi, do të ndalej me të, por mesa duket nuk u ndal. Domethënë partia dhuratë që mori Lulzim Basha i shkoi dhuratë Enkelejd Alibeajt dhe ja ku jemi”.
-A të bën logoja kryetar?
-“Kjo është një nga ato pyetjet retorike. Nuk të bën logoja kryetar, sikurse nuk të bën kryetar as vetëm vula. Por ky nuk është problemi kryesor, nuk është problemi për të gjetur fajtorin sot, nuk është problemi për t’i thënë dikujt ti nuk je i zoti, apo pse u katandis partia me 11 kandidatë. Problemet janë aq të mëdha në PD, të strukturuara vit pas viti, sa sot është tërësisht e vështirë dhe fatkeqësisht mesa duket do të duhet të bëhet ende më keq për t’u bërë nesër më mirë”.