Ekipi i Universitetit të Prishtinës triumfoi në kategorinë Archicad Prize të Inspireli Awards 2026, në një garë ku morën pjesë 2.801 projekte nga 108 shtete të botës.
Studentët e Fakultetit të Arkitekturës të Universitetit të Prishtinës kanë shënuar një sukses ndërkombëtar, duke fituar vendin e parë në kategorinë Archicad Prize në konkursin prestigjioz Inspireli Awards 2026, transmeton albinfo.ch.
Ceremonia e ndarjes së çmimeve u mbajt më 24 tetor në Pragë të Çekisë, ndërsa në edicionin e 11-të të këtij konkursi morën pjesë gjithsej 2.801 projekte nga 108 shtete të botës.
Çmimi iu nda ekipit të studentëve shqiptarë për projektin e tyre të titulluar “THE CRACK – Connected”, me të cilin ata arritën të dallohen në mesin e pjesëmarrësve nga vende të ndryshme të botës.
Ekipi fitues përbëhet nga Argeta Zekaj, Blerta Kaqorraj, Dafina Ahmetaj, Doruntina Sylejmani dhe Florian Shala.
Kjo arritje përbën një vlerësim për punën, kreativitetin dhe përkushtimin e studentëve, si dhe përfaqëson një sukses për Fakultetin e Arkitekturës dhe Universitetin e Prishtinës në fushën e arkitekturës në nivel ndërkombëtar.
Fitimi i çmimit në një konkurs me pjesëmarrje nga 108 shtete e vendos projektin e studentëve të Prishtinës në mesin e punimeve të vlerësuara në këtë edicion të Inspireli Awards./Albinfo.ch