Ministri i Mjedisit Jetësor dhe Planifikimit Hapësinor, Muamet Hoxha, sot kreu inspektim të punimeve për rregullimin e shtratit të Suva Rekës në Komunën e Sarajit. Projekti përfshin rregullimin e rreth 12 kilometrave të rrjedhës së lumit, nga rruga për në Bojanë, përmes Gllumovës, deri te derdhja në lumin Treska.
Për më pak se tre muaj nga fillimi i punimeve, janë realizuar 20% e projektit, për të cilin Ministria ka siguruar mbi 379 milionë denarë. Me realizimin e projektit do të zvogëlohet rreziku nga përmbytjet, do të mbrohen shtëpitë, pronat dhe tokat bujqësore, si dhe do të kontribuohet për një mjedis jetësor më të pastër dhe më të sigurt për banorët e këtij rajoni.
„Ky projekt është i rëndësishëm sepse u përgjigjet nevojave shumëvjeçare të qytetarëve. Fakti që për më pak se tre muaj janë realizuar 20% e projektit tregon se punimet po përparojnë. Sot jemi në terren për ta ndjekur realizimin dhe për t’u siguruar që aktivitetet vazhdojnë në përputhje me planifikimin. Detyrimi ynë nuk përfundon me sigurimin e mjeteve dhe fillimin e punimeve. Ai nënkupton ndjekje të përgjegjshme të çdo faze, deri në përfundimin e projektit“, theksoi ministri Hoxha.
Ai theksoi se bashkëpunimi ndërmjet pushtetit qendror dhe atij lokal është i rëndësishëm për zbatimin në kohë të projekteve infrastrukturore që ndikojnë drejtpërdrejt në cilësinë e jetës së qytetarëve.
Rregullimi i Suva Rekës është pjesë e investimeve më të gjera në mjedisin jetësor dhe infrastrukturën komunale, të cilat përfaqësojnë themelet e kthesës së gjelbër dhe krijojnë kushte për vendbanime më të mbrojtura dhe zhvillim të qëndrueshëm të komunave.