Kumanovë – Me rastin e shënimit të festës së 11 Tetorit, Sektori për Punë të Brendshme (SPB) në Kumanovë, përmes Seksionit për Parandalim, organizoi konkurs letrar me temën “Qyteti im feston”, ku morën pjesë nxënës nga shkollat fillore dhe të mesme, nga paralelet në gjuhën maqedonase dhe shqipe.
Në këtë aktivitet morën pjesë nxënësit pjesëmarrës, drejtorët e shkollave, mentorët e tyre dhe prindërit. Të rinjtë prezantuan krijimet e tyre letrare, ndërsa komisioni përzgjodhi punimet më të mira në kategorinë e shkollave fillore dhe të mesme.
Në kategorinë e shkollave të mesme, nxënësja Gerta Hebibi nga SHMK “Nace Bugjoni” në Kumanovë u rendit në vendin e dytë, me një krijim letrar që mori komente pozitive dhe vlerësime nga të pranishmit.
Shefja e Seksionit për Parandalim, magjistrja Lile Mlladenovska, falënderoi të gjithë pjesëmarrësit, drejtorët e shkollave, mentorët dhe prindërit për angazhimin dhe bashkëpunimin e tyre.
Ajo theksoi rëndësinë e bashkëpunimit ndërmjet institucioneve arsimore dhe policisë në organizimin e projekteve dhe aktiviteteve të përbashkëta me nxënësit, duke vënë në pah se iniciativa të tilla ndihmojnë në kultivimin e bashkëjetesës, shoqërimit dhe mirëkuptimit ndërmjet të rinjve.
Në fund, Mlladenovska i përcolli urimet e saj nxënëses Gerta Hebibi për suksesin e arritur në këtë konkurs letrar.
