Raporton Televizioni News
Kumanovë – Këshilltari komunal nga radhët e Bashkimit Demokratik për Integrim (BDI), Blerim Hyseni, ka vazhduar reagimin lidhur me mungesën e gjuhës shqipe në tabelën e sallës sportive të saporenovuar në Kumanovë, duke kërkuar respektimin e të drejtave gjuhësore të shqiptarëve.
Hyseni vë në dukje, siç shprehet ai, ironinë e situatës: salla është rinovuar me mjete publike, përfshirë edhe paratë e taksapaguesve shqiptarë, por në tabelën e objektit nuk është përfshirë gjuha shqipe.
“Mund të rinovohet një sallë e tërë me para edhe të taksapaguesve shqiptarë, por të ‘harrohet’ e drejta e tyre me ligj për gjuhën shqipe! Për renovim bëhen projekte, tenderë e ceremoni, por për gjuhën shqipe mjafton një heshtje e qëllimshme?”, ka deklaruar Hyseni.
Ai thekson se përdorimi i gjuhës shqipe nuk duhet të trajtohet si favor, por si e drejtë që duhet të respektohet.
“Le të jetë e qartë, gjuha shqipe nuk është favor që na e bën dikush, as kërkesë që mund të lihet për një ditë tjetër. Është e drejtë dhe duhet të respektohet!”, ka shkruar ai.
Këshilltari komunal kërkon që tabela e sallës sportive të plotësohet menjëherë edhe në gjuhën shqipe, duke u bërë thirrje autoriteteve përgjegjëse që të veprojnë në përputhje me ligjin.
Në reagimin e tij, Hyseni u drejtohet edhe përfaqësuesve komunalë, duke theksuar se investimet infrastrukturore duhet të shoqërohen me respektimin e barazisë gjuhësore.
“Respekti nuk matet me pllaka të reja, por me zbatimin e ligjit dhe barazinë në praktikë!”, përfundon reagimi i tij.
Çështja e tabelës në sallën sportive ka hapur debat për përdorimin e gjuhës shqipe në hapësirat publike në Kumanovë. Deri në momentin e publikimit, sipas informatave të bëra publike, nuk ka pasur reagim zyrtar nga Komuna e Kumanovës lidhur me këtë çështje.