Sa më shumë që Ali Ahmeti përpiqet ta shpëtojë Artan Grubin, aq më shumë duket se po e bën kurban. Edhe herën e kaluar, kur garantonte se nuk do të kishte aktakuzë dhe se Grubi do të dilte në liri, ndodhi krejt e kundërta. Grubit iu vazhdua paraburgimi dhe nisi procedura kundër tij, vlerëson partia në pushtet VLEN.
‘Çfarë po përpiqet të parandalojë Ahmeti? A ka frikë nga ajo që Grubi mund të thotë? Apo po e sakrifikon me vetëdije, duke menduar se kështu do t’ia hapë vetes rrugën për t’u kthyer në pushtet?
Duke garantuar se Grubi është i pafajshëm, Ahmeti në fakt po punon që ai të dënohet.
Presioni publik dhe politik ndaj gjykatës, në një rast ku përfshihet një person nga lista e zezë e SHBA-së, mund të prodhojë vetëm efektin e kundërt. Kjo lojë kumari e Ahmetit vetëm sa po ia përshpejton pensionimin politik. Është çështje kohe kur pakënaqësia brenda BDI-së do të dalë në sipërfaqe’, reagon VLEN.
Sipas tyre, Ahmeti dy vite u ‘shet përralla’ mbështetësve të vet se gjoja sot a nesër do të kthehen në Qeveri.
‘Nuk u kthyen, ndërsa në zgjedhjet lokale pësuan debakël. Tani po përpiqet që edhe rastin e Grubit ta kthejë në një tjetër bixhoz politik. Vetëm se këtë herë në lojë nuk është vetëm Grubi, por edhe vetë Ahmeti’, thekson VLEN.