Kryeministri Hristijan Mickoski tha se agjenda e reformave po lëviz në drejtimin e duhur dhe se vendi ka një shans të pozicionohet midis “udhëheqësve” në këtë proces.
Ai theksoi se është parashikuar një “periudhë mirësjelljeje” deri më 30 qershor për përfundimin e disa prej detyrimeve dhe shprehu pritjen e tij se rezultatet do të jenë të dukshme në raportin e ardhshëm.
“Ne kemi një agjendë ambicioze. Qëllimi ynë është të zbatojmë reforma në vend, të përfundojmë axhendën e reformave dhe planin e veprimit, dhe të tregojmë se kemi kapacitet të jemi midis vendeve kryesore”,tha Mickoski.
Ai shtoi se Qeveria dëshiron të përqendrohet në reformat e brendshme dhe të lërë në plan të dytë, siç tha ai, kërkesat që lidhen me ndryshimet kushtetuese.
Në fushën e energjisë, Kryeministri njoftoi se po punohet për një model që mund t’u sjellë qytetarëve energji elektrike më të lirë.
Sipas tij, zgjidhjet e reja, të dakordësuara në konsultim me Komisionin Evropian, mund të mundësojnë një ulje të çmimit të energjisë elektrike me 5 deri në 10 përqind.
“Edhe pse tregu është liberalizuar, po bëjmë sqarime të mëtejshme në Ligjin e Energjisë. ESM nuk do të furnizojë më shumë se 70% të nevojave të furnizuesit nga 1 janari 2027. Qëllimi është të arrihet një çmim më i lirë dhe i qëndrueshëm@, theksoi Mickoski.
Ai shpjegoi se konsumi i energjisë elektrike ndahet në periudha të ditës dhe vitit, me çmime të ndryshme në sezonin e dimrit dhe verës, si dhe gjatë ditës dhe natës, varësisht nga prodhimi nga burimet e rinovueshme.
“Duam të krijojmë një model që do të jetë një situatë fitimprurëse për të dyja palët – si për sistemin ashtu edhe për qytetarët. Në periudha të caktuara, energjia elektrike nga kapacitetet diellore është pothuajse në çmim zero ose edhe negativ”, tha Kryeministri.
Mickoski shtoi se shumica e masave në axhendën e reformave janë në fazën përfundimtare, dhe Kodi Zgjedhor mbetet një çështje e hapur, e cila varet nga një marrëveshje politike me opozitën.