Lëvizja Vetëvendosje ka zhvilluar një takim me mërgatën shqiptare në Cyrih të Zvicrës, ku i pranishëm ishte edhe lideri i kësaj partie, Albin Kurti.
Kurti para të pranishmëve foli për zhvillimin ekonomik dhe sistemin e drejtësisë në Kosovë, derisa premtoi themelimin e një banke zhvillimore.
“Do ta themelojmë bankën zhvillimore, për ta mbështetur zhvillimin industrial dhe ndërmarrjet”, tha Kurti.
Ai tha se partneri kryesor tregtar i Kosovës në rajon tashmë është Shqipëria dhe jo Serbia, siç ishte sipas tij në qeveritë e kaluara.
“Partneri kryesor i Kosovës nga qeveritë e kaluara në rajon ishte Serbia. Tash, me qeverinë tonë, partneri kryesor tregtar në rajon është Shqipëria, ndërsa në përgjithësi është Bashkimi Evropian, e në veçanti Gjermania. Por, kjo rritje ekonomike e ka të domosdoshme drejtësinë, pra jo vetëm shpërndarje e rishpërndarje, por edhe drejtësi. Drejtësinë ende nuk e kemi të drejtë. Drejtësinë në Kosovë akoma e kemi të shtrembër. E në mandatin e ardhshëm duhet ta drejtojmë drejtësinë dhe ta vendosim në binarë… dhe drejtësia duhet të vlejë për të gjithë”, tha Kurti.
Ai shtoi se askush nuk duhet të jetë mbi ligjin, pavarësisht kontributit të dhënë për vendin.
“Ne kemi respekt për të gjithë ata që sakrifikuan e kontribuuan për çlirimin dhe pavarësinë e Kosovës, mirëpo çfarëdo kontributi që ka bërë cili do prej nesh nuk është leje për korrupsion e për pasurim. Prandaj, ne themi në çdo tubim, nuk ka edhe patriot edhe hajn – ose patriot, ose hajn. Nuk ka edhe çlirimtar, edhe zullumqar. Ose çlirimtar, ose zullumqar. E ne jemi bashkë me juve për patriotët e çlirimtar e kundër hajnave e zullumqarë”, deklaroi ai, transmeton KosovaPress.
Në pamjet e publikuara në rrjetet sociale, salla shihet e mbushur me flamuj kombëtarë dhe brohoritje për Kurtin dhe subjektin që ai drejton.
Zgjedhjet e parakohshme në Kosovë mbahen më 7 qershor.