Pavarësisht pretendimeve të opozitës për bllokim të negociatave të Shqipërisë drejt Bashkimit Europian, në një intervistë për Vizion Plus, ambasadori i BE-së, Silvio Gonzato, u shpreh se janë vendet anëtare ato që vleresojnë standartet.
“E di që po bëhen shumë diskutime, ka bllokim. Dëgjoj gjithmonë që ka diskutime, por gjërat gjithmonë në këtë proces ecin. Në Bashkimin Europian janë vendet anëtare që shikojnë standardet. Sigurisht që ato lexojnë raportet e Bashkimit Europian në këtë rast për Shqipërinë, por edhe vetë bëjnë punën e tyre për të parë se cilat standarde janë përmbushur apo duhet të përmbushen, në mënyrë që të mbyllen të gjithë kapitujt dhe Shqipëria të ec përpara”, tha Silvio Gonzato, Ambasador i BE-së
Gonzato thekson se të gjithë aktorët janë duke punuar për ta bërë të mundur integrimin e Shqipërisë në Bashkimin Europian deri në vitin 2030.
“Por këto lloj diskutimesh, që janë kaq të rëndësishme dhe të qenësishme, nuk mund të mbyllen brenda 2 apo 3 javësh. Kërkojnë kohën e duhur. E rëndësishme është që vendet anëtare po diskutojnë me njëra-tjetrën dhe Komisioni Europian është aty për të lehtësuar të gjitha këto diskutime. Ajo që nuk duhet të harrojmë është që ekziston vullneti i mirë dhe vendosmëria për të ecur përpara për Shqipërinë. Por Shqipëria duhet të bëjë një punë rigoroze edhe për sa i përket reformave, sepse në fund të fundit janë këto reforma që do të kenë një ndikim në cilësinë e jetës së qytetarëve shqiptarë”, tha ambasadori.
Shqipëria deri në këtë moment ka hapur të gjithë grupkapitujt, ndërsa pritet raporti i piketave të ndërmjetme nga Brukseli.