Kryetari i Kuvendit, Niko Peleshi, ka ndërprerë seancën plenare pas debateve me deputetin demokrat Luçiano Boçi.
Gjithçka nisi pas prezantimit të projektligjit për krijimin e Agjencisë Kombëtare të Shërbimeve Arsimore nga ana e ministres së Arsimit, Mirela Kumbaro, e cila theksoi se kjo është një reformë që synon të transformojë rrënjësisht mënyrën se si ofrohen shërbimet për qytetarët në arsim.
“Do të kemi një partner shumë prestigjioz, siç është Qendra e Vlerësimeve e Universitetit të Kembrixhit, të cilët do të shoqërojnë ngritjen e Agjencisë së re në procesin e teknologjisë dhe të trajnimeve disavjeçare. Veprimtaria e Agjencisë Kombëtare të Shërbimeve Arsimore do të mbikëqyret nga Ministria e Arsimit, e cila do të ketë për detyrë të verifikojë zbatimin korrekt të politikave dhe strategjive kombëtare në fushën e arsimit. Në projektligjin për krijimin e Agjencisë Kombëtare të Shërbimeve Arsimore parashikohet drejtimi nga një këshill drejtues, i cili është një ndër instrumentet me të cilët administrohen agjencitë autonome. Ky këshill do të drejtohet nga ministri përgjegjës për arsimin dhe vendimet më të rëndësishme të Këshillit, që kanë të bëjnë me buxhetin, pagat dhe tarifat për shërbimet publike, do të kalojnë edhe në një filtër tjetër dhe do të miratohen me vendim të Këshillit të Ministrave”, tha Kumbaro.
Pas fjalës së Kumbaros, Boçi shkoi sërish në foltore, por këtë herë kreu i Kuvendit, Peleshi, nuk e lejoi, pasi sipas rregullores fjala duhej kërkuar më parë.
Pas disa minutash debat, deputetët e PD-së bllokuan foltoren, ndërsa Peleshi përjashtoi nga seanca e sotme Boçin për gjuhë fyese.