Deputetja socialiste Romina Kuko është shprehur optimiste për ecurinë e negociatave të Shqipërisë me Bashkimin Europian, duke theksuar se procesi po zhvillohet në ritmin e duhur për të përmbushur objektivin e anëtarësimit deri në vitin 2030.
Në një lidhje të drejtpërdrejtë në edicionin qendror të lajmeve në televizionin kombëtar Vizion Plus me moderator Roland Zilin, Kuko sqaroi se krahasimet me vendet e tjera të rajonit, si Mali i Zi, nuk duhet të krijojnë panik, pasi këto vende kanë nisur negociatat shumë më herët.
Sipas saj, Shqipëria, edhe pse i ka hapur negociatat në vitin 2022, ka arritur të përmbyllë procedurat e prezantimit të kapitujve dhe po vijon punën në përputhje me kërkesat e Komisionit Europian.
Ajo hodhi poshtë pretendimet e opozitës për një bllokim të procesit, duke theksuar se negociatat vijojnë normalisht dhe se institucionet shqiptare janë në komunikim të vazhdueshëm me Brukselin.
Kuko u shpreh se situata aktuale gjeopolitike e favorizon procesin e integrimit të Shqipërisë, pasi Perëndimi ka interes strategjik për të mbajtur Ballkanin Perëndimor brenda orbitës së tij.
INTERVISTA E PLOTË:
Si mund ta konsiderojmë ecurinë e deritanishme të negociatave? A është në ritmin e duhur për të përmbushur objektivin e anëtarësimit brenda vitit 2030?
Romina Kuko: Sigurisht. Në radhë të parë unë dua të bëj një sqarim sepse këto ditë ka filluar një kakofoni shumë e madhe lidhur me lajmin e Malit të Zi për hartimin e marrëveshjes së anëtarësimit. Unë dua të specifikoj që Mali i Zi i ka hapur negociatat në vitin 2012, ndërsa Shqipëria i ka hapur vetëm në vitin 2022 dhe brenda këtyre viteve ka mbyllur të gjithë procedurën e prezantimit të kapitujve. Nuk do të doja që të kishim këtë panikun e konkurrencës rajonale. Negociatat kanë kërkesat e tyre nga vendet anëtare dhe nga Komisioni Europian, të cilat përmbushen nga Shqipëria në aspektin ligjor, por edhe politik. Jam shpresëplotë se do të kemi lajme shumë të mira nga mbledhja e Komisionit të Jashtëm të Parlamentit Europian, e cila do të zhvillohet në fillim të majit.
Opozita thotë nga ana e saj se procesi në fakt është bllokuar për shkak të qasjes së qeverisë suaj ndaj korrupsionit, duke thënë se edhe raporti IBAR nuk është miratuar që nga muaji shkurt. Sa e vërtetë është kjo sipas jush?
Romina Kuko: Nuk kemi absolutisht as edhe një bllokim të procesit. Ekipet negociatore vazhdojnë punën, ka kontakt të përditshëm nga ministritë e linjës me Brukselin, ka hartim dhe miratim legjislacioni të përjavshëm. Jemi në fazën e pyetjeve dhe përgjigjeve që kërkon Brukseli. Jam shumë e habitur se si dikush nga opozita e thotë me një farë kënaqësie se negociatat janë bllokuar, pasi integrimi në BE i takon gjithë shqiptarëve dhe nuk duhet shijuar një “bllokim imagjinar” si goditje për kundërshtarin politik
Cilët janë disa nga kapitujt kryesorë që mbeten më sfiduesit për qeverinë dhe për parlamentin, duke patur parasysh dhe faktin që tashmë pas hapjes pritet verifikimi në terren dhe për mbylljen e tyre apo jo?
Romina Kuko: Tani përdoret një metodologji tjetër ku negociohet sipas një grupi kapitujsh. Grupi i parë i kapitujve që quhen “themeloret” (fundamentals) është shumë i rëndësishëm, pasi ka të bëjë me rendin, sigurinë publike, pra kapitujt 23-24, taksat dhe aspektet e tjera. Ka kapituj ku kërkesat e Brukselit janë shumë të mëdha, siç është siguria ushqimore se bëhet fjalë për tregun e përbashkët, dhe mjedisi, që kap një gamë shumë të madhe dhe është kapitull i vështirë. Këta janë kapituj që garantojnë demokratizimin, si liria, drejtësia, gjyqësori dhe siguria ekonomike
Sa na favorizon situata gjeopolitike në këtë proces në këto momente?
Romina Kuko: Na favorizon shumë sepse tani janë duke u ndarë edhe njëherë zonat e influencës në botë. Jemi në një multipolaritet ku shtetet e mëdha konkurrojnë për zona influence dhe Perëndimi nuk mund të ketë luksin ta lërë Ballkanin Perëndimor të rrëshkasë drejt Lindjes, ashtu siç ndodhi pas Luftës së Dytë Botërore. Besoj se do të kemi një proces sa sfidues për shkak të kërkesave, aq edhe të lehtësuar nga rrethana gjeopolitike.
/vizionplus.tv