Politikani Paskal Milo, i ftuar në “Quo Vadis” të moderatores Pranvera Borakaj, ka kaluar në skanim gjithë politikën shqiptare të këtyre 35 viteve, por edhe marrëdhëniet e tij me liderët politikë.
Milo ka kujtuar se ka pasur një bashkëpunim të fortë me Edi Ramën, kur ky ishte kryetar i PS në opozitë, por që ndryshoi pas ardhjes në pushtet.
Sipas Milos, Rama nuk iu përmbajt marrëveshjes së vitit 2013 me aleatët.
Pjesë nga biseda:
Milo: Më ka mbetur si relike një marrëveshje në vitin 2013, se në varësi të kontributeve që do të jepnim, do të bëhej edhe ndarja e pushtetit.
Borakaj: Ju pritët?
Milo: Deri në vitin 2014.
Borakaj: Kur u dorëzuat?
Milo: Unë bëra një tërheqje të butë, jo konfliktuale, duke kuptuar se ai kishte fituar pushtetin dhe nuk dëshironte ta ndante, prandaj u riktheva te dashuria ime për shkencën.
Borakaj: E mendonit Ramën kaq gjatë në pushtet?
Milo: Jo, me thënë të drejtën. Duke njohur ambiciet dhe aftësitë e tij, kisha mendimin që do të sillte ndryshime, dhe në fakt solli. Duhet të pranojmë që ka sjellë ndryshime, por masa e ndryshimeve pozitive në raport me keqpërdorimin e pushtetit mbetet për t’u parë. Do të ketë një gjykim të ftohtë për të evidentuar edhe vlerat, edhe antivlerat, edhe kontributet, por edhe dëmet. Por kjo nuk besoj se do të bëhet nga unë apo nga njerëz si puna ime, të cilët tashmë jemi tërhequr në punët tona që na japin kënaqësi, pa hequr dorë nga vëmendja ndaj proceseve politike dhe qeverisëse.