Politikani Paskal Milo, i ftuar në “Quo Vadis” këtë të martë, ka analizuar edhe punën e bërë nga drejtësia e re.
Milo tha se ajo ka bërë një punë të mirë dhe se ndryshimet nuk duhen pritur menjëherë.
Megjithatë, Milo kishte edhe rezerva për mënyrën se si u shoqëruan Ilir Meta dhe Erion Veliaj.
Pjesë nga biseda:
Borakaj: Një vlerësim në raport me drejtësinë e re?
Milo: E kam parë si një proces pozitiv. Duhet që të gjithë ta shohim pozitivisht atë që ka ndodhur me reformën në drejtësi. Pse? A mund të prisnim rezultate spektakolare nga një drejtësi që në Shqipëri ka qenë për faqe të zezë? Nuk mund të prisnim, sepse do kohën e vet. Procesi i rimëkëmbjes kërkon kohë, sepse edhe ata janë njerëz, kanë interesa, kanë kundërshti, kanë armiq. Janë një sërë faktorësh që ndikojnë. Nuk duhet parë sikur u morën disa dekrete dhe kaq; dekretet i bëjnë njerëzit, reformën e bëjnë njerëzit. Sot ata janë njerëz me nivel kulturor dhe profesional, por kanë edhe interesat e tyre. Aty ndërthuren një numër faktorësh dhe influencash që nuk e lejojnë këtë mekanizëm të komplikuar të funksionojë në mënyrë normale, që ne nga jashtë të gjykojmë efektivitetin e tij. Është një proces që nuk mund të kryhet as për 10 vjet. Për shkak të vështirësive, unë e kam vlerësuar; mund të mos ketë arritur objektivat optimale, por ka bërë progres.
Borakaj: A keni ndier keqardhje për ndonjë politikan që ka përfunduar në dyert e drejtësisë?
Milo: Po. Nuk duhet të fshihemi si struci për ngjarjet që kanë tronditur politikën shqiptare, aq më tepër që i kam njohur në rrethana të tjera. Në radhë të parë kam ndier keqardhje për një kategori politikanësh, qofshin të majtë apo të djathtë, që kanë përfunduar në paraburgim apo në burg. Sepse i kam njohur në kohë të tjera, në pozita të tjera, dhe njeriu për nga natyra shpreh keqardhje për fatkeqësi të tilla. Por, përtej ndjenjës njerëzore, kur ballafaqohesh me fakte dhe kur ato vërtetohen nga gjykatat, atëherë ke një lloj ngushëllimi për keqardhjen tënde, pasi institucioni përkatës ka gjykuar me drejtësi.
Por dua të them se nuk jam pajtuar, përkundrazi jam revoltuar për akte skandaloze në trajtimin e politikanëve, me arrestime brutale që u janë bërë, në mënyrë të veçantë ish-Presidentit të Republikës, ish-kryetarit të Kuvendit dhe ish-kryeministrit Ilir Meta. Ka qenë e jashtëzakonshme ndjesia që kam provuar kur kam parë që të trajtohej në atë mënyrë një ish-kryetar shteti. Më ka lënë vragë në shpirt. Kishte forma dhe mënyra të tjera për ta kryer atë ndalim, jo vetëm për Ilir Metën, por për çdo qytetar. Po kështu edhe për Erion Veliajn; ishte pak më e zbutur, por pak a shumë e njëjta qasje.