Zhurma e brendshme në PS pas qëndrimeve të Elisa Spiropalit në rrjetet sociale ka sjellë reagimin e kreut të grupit parlamentar të mazhorancës. I pyetur nga mediat nëse PS do te mbaje një qëndrim për kritikat e Spiropalit, Balla tha se në fund të sesionit parlamentar do të bëhet një analizë e performancës së çdo ligjvënësi.
“Ne kemi një rregull që në çdo fund sesioni bëjmë një analizë të performancës së punës së çdo deputeti, kryesia e grupit parlamentar i paraqet grupit parlamentar një raport”, tha Balla.
Duke sqaruar se kritikat e Spiropalit nuk janë shprehur gjatë mbledhjeve të grupit, Balla theksoi vlerësimi i përformancave të deputetëve bëhet çdo korrik.
“Jo, nuk i ka shprehur. Për performancën e çdo deputeti të Partisë Socialiste është rregull, unë kam 21 vjet në këtë grup parlamentar, atëherë bëhet një vlerësim i performancës së secilit, ku padyshim pastaj kërkohet përmirësimi i punës apo çështje të tjera”, tha Balla.
Sa i përket procesit të rienergjizimit të partisë, shefi i deputetëve të majtë u shpreh se kjo është edhe një mënyrë për t’u përgatitur për zgjedhjet e ardhshme vendore.
“Ky proces rienergjizimi i partisë ndërlidhet me fazën tjetër. Faza tjetër janë zgjedhjet vendore. Partia Socialiste e Shqipërisë konkurron për të fituar në të 61 bashkitë e vendit”, tha Balla.
Për mediat, Balla gjithashtu shpjegoi se ndryshimet ne kodin e procedurës penale nuk kanë mbetur ne sirtarët e kuvendit por do të diskutohen në komisione brenda këtij sesioni.