Sot, në orën 19:00, opozita zhvillon protestën e 7-të kundër qeverisë së drejtuar nga kryeministri Edi Rama. Partia Demokratike ka vendosur t’i kthehet modelit të tubimeve me fjalime dhe, në bulevardin “Dëshmorët e Kombit”, po punohet për vendosjen e skenës. Kryetari i PD-së, Sali Berisha, pak orë para protestës deklaroi se qytetarët ngrihen sot për të kërkuar largimin e kryeministrit Edi Rama.
“Ngrihen për të mbrojtur dinjitetin, nderin e çdo shqiptari ndaj një agresioni të rëndë të një organizate kriminale të kryesuar nga Edi Rama, që më së fundi, duke hequr çdo maskë, përdori 83 mandatet e krimit për të mbrojtur vjedhjet e tij të pallogaritshme dhe të Lubi Ballukut. Akti i fundit i Edi Ramës është akti më armiqësor që ai ka ndërmarrë në serinë e akteve armiqësore ndaj shtetit ligjor, demokracisë në Shqipëri.”
Por opozita ka vendosur në qendër të kësaj proteste edhe situatën ekonomike dhe rritjen e çmimit të karburantit.
“Qytetarët shqiptarë kanë sot 1001 motive për të dalë nga guaska e konformizmit dhe e frikës, për t’u bashkuar me ne në kryengritjen tonë paqësore. Kriza, lufta në Lindjen e Mesme, jashtë atij rajoni, pasojat më të rënda në botë po i përjetojnë qytetarët shqiptarë me çmimin më të lartë në planet të naftës. Dhe kjo jo kryesisht për shkak të luftës, por kryesisht për shkak të naftës Rama, taksë që për litër naftë është më e larta në botë.”
Protestat e opozitës nisën në fundin e vitit të kaluar, kur u bënë publike hetimet e SPAK-ut për ish-zëvendëskryeministren Balluku dhe tenderat e AKSHI-t. Opozita kërkon largimin e kryeministrit Rama dhe krijimin e një qeverie teknike.
/vizionplus.tv