Kryedemokrati Sali Berisha, në fjalën e tij para demokratëve në protestën para kryeministrisë, bëri krahasime mes opozitës shqiptare dhe asaj hungareze, e cila fitoi zgjedhjet së fundmi.
Sipas tij, në Hungari fitoi opozita pasi nuk pati kundër median dhe nuk iu mbyll TikToku.
“Ka një ndryshim thelbësor mes opozitës në Shqipëri dhe asaj në Hungari: mafia e zezë e fjalës së lirë, e cila mashtron 24/7 opinionin publik për të mbrojtur regjimin. Ata, për t’ju mashtruar, krahasojnë të pakrahasueshmen. Në Hungari nuk u arrestua ndonjëherë lideri i opozitës në vitin zgjedhor, siç ndodhi në Shqipëri dhe në Tunizi. Nuk u mor vula dhe logoja me urdhër politik. Në Hungari, qeveria nuk shpërndau 100 euro për çdo pensionist për të blerë votën në kulmin e fushatës elektorale. Në qytetet e Hungarisë, votën e qytetarëve nuk e kontrolluan kartelet e drogës, siç e kontrolluan në qytetet e Shqipërisë. Në zgjedhjet në Hungari, qeveria nuk fali gjobat dhe kamatat 2 ditë para zgjedhjeve, siç bëri narkodiktatori i Ramës. Në Hungari, mediat komerciale ishin në anën e opozitës dhe TikToku nuk u bllokua, kurse në Shqipëri 90% e mediave kontrollohen nga Rama dhe mbjellin çdo ditë censurë, mashtrim dhe trillim për opozitën, atje TikToku nuk u bllokua si këtu”, tha Berisha.