Avokati Redi Ramaj, i ftuar këtë të enjte në studion e Quo Vadis të moderatores Pranvera Borakaj në Vizion Plus, komentoi vendimin e fundit të GJKKO për të pranuar kërkesën e avokatëve të ish-kryeministrit Sali Berisha që kryeministri Edi Rama të thirret në gjyq si dëshmitar për “Dosjen Partizani”.
Ramaj tha se ky është një rast i veçantë në Shqipëri, pasi për herë të parë ndodh që një kryeministër thirret si dëshmitar për një çështje penale.
Pjesë nga biseda:
Borakaj: Si e shikon këtë qasje?
Ramaj: Sa i përket thirrjes së kryeministrit, besoj se është rast i veçantë në Shqipëri. Është hera e parë që thirret një kryeministër për çështje penale. Mirë është që çdo person që ka dijeni të japë dëshminë e tij, pa dallim. Gjykata duhet të ketë bërë veprimin e drejtë, ka parë që dosja e mbrojtjes ka qenë e ligjshme dhe duhet të pranohen të gjithë dëshmitarët. Mbrojtja fillimisht, duke thirrur dëshmitarë, kërkon që palës së saj t’i lehtësohet pozita dhe kjo strategji është përdorur. A duhet të ishte thirrur më herët? Unë mendoj se SPAK nuk e ka menduar ta thërrasë Ramën më herët. Por gjykata është mbi prokurorin në këtë moment. Ardhja e dëshmitarëve i vlen këtij procesi.