Në Samitin IV të Diasporës, Kryeministri Edi Rama theksoi rolin e rëndësishëm të shqiptarëve jashtë vendit në vendimmarrjen dhe zhvillimin e Shqipërisë, duke e cilësuar pjesëmarrjen e tyre në zgjedhje si një hap të madh drejt përfshirjes demokratike.
Rama u ndal te ndryshimi i perceptimit ndërkombëtar për Shqipërinë, duke kujtuar se dikur shqiptarët përballeshin me paragjykime për origjinën e tyre, ndërsa sot ndihen krenarë kudo në botë. Sipas tij, emri i Shqipërisë ka pësuar një transformim të thellë, duke kaluar nga një imazh negativ në një simbol të diellit, detit dhe mikpritjes.
Ai theksoi se në të kaluarën vendi përmendej shpesh me dyshim apo përbuzje, ndërsa sot zgjon kuriozitet dhe gjithnjë e më shumë dëshirë për t’u vizituar. “Shqipëria tashmë flet vetë në të gjitha gjuhët e botës”, u shpreh ai, duke shtuar se vendi ka ndryshuar ndjeshëm që nga Samiti i parë i Diasporës.
Edi Rama:
“Sot ju vini këtu pasi e keni ushtruar të drejtën në zgjedhjet e vitit të shkuar. Nga një e drejtë e kërkuar në një të drejtë të ushtruar. Një zë që tani është pjesë e vendimmarrjes popullore në udhëheqjen e vendit. Atëherë shumë prej jush shpesh përballeshit me paragjykime për emrin e vendit tuaj. Sot ju jeni kryelartë kudo kur emri i vendit tonë thirret në vëmendje.
Emri i Shqipërisë ka kaluar një transformim të thellë. Nga një sinonim i një të keqeje, që është bërë sinonim i diellit, detit dhe mikpritjes. Nga një vend që përmendej në rastin më të mirë me dyshim dhe në të keq me përbuzje. Sot, në rastin më të mirë me kuriozitet dhe në rastin edhe më të mirë me dëshirë. Shpesh duhej shpjeguar ku binte në hartën e botës; sot flet vetë në të gjitha gjuhët e botës”
/vizionplus.tv