Seanca gjyqësore ndaj kryetarit të Bashkisë së Tiranës, Erion Veliaj, ka nisur me një orë vonesë dhe është shtyrë për shkak të mungesës së tij.
Gjatë seancës, gjyqtarja relatore Ëngjëllueshe Tahiri bëri të ditur se Drejtoria e Burgjeve nuk ka zbatuar urdhrin e gjykatës për shoqërimin e Veliajt, ndërsa nuk është dorëzuar asnjë deklaratë që të shpjegojë arsyet e mungesës së tij.
“Drejtoria e burgjeve nuk ka zbatuar urdhrin e gjykatës për shoqërimin e Veliajt dhe po ashtu nuk ka vënë në dispozicion gjykatës deklaratën e tij”, tha gjyqtarja kryesuese Tahiri.
Nga ana tjetër, avokati mbrojtës Plarent Ndreca kërkoi garantimin e të drejtave procedurale të klientit të tij, duke theksuar se Veliaj nuk ka shprehur vullnetin për pjesëmarrje në seancë dhe se në këto kushte gjykimi nuk mund të vijojë.
“Së pari ju duhet të garantoni të drejtën e çdo të pandehuri për t’u njoftuar dhe po ashtu fakti që zoti Veliaj nuk e ka shprehur vullnetin e tij nëse do të marrë pjesë në seancën e sotme. Mendoj që nuk mund të vijojë gjykimi. Ndërsa përsa u përket 24 fashikujve që ju si gjykatë theksoni që janë fashikuj që lidhen me njoftimin e akuzës, për të pandehurit e tjerë. Ne kërkojmë çdo fashikull se janë të pandehur në një procedim të lidhur”, tha Ndreca.
Ndërkohë, prokurori Altin Dumani deklaroi se moszbatimi i urdhrit nga Drejtoria e Burgjeve është një problem i përsëritur dhe po bëhet shkak për shtyrjen e seancave.
“Na rezulton se drejtoria e burgjeve nuk ka zbatuar urdhrin e gjykatës. Po ashtu duhet të mësohet se përse drejtoria e burgjeve nuk ka zbatuar urdhrin e gjykatës sepse nuk është hera e parë dhe mos njoftimi i të pandehurit po bëhet shkak për shtyrjen e seancës. Në këto kushte vlerësojmë se seanca nuk mund të zhvillohet. Kërkojmë që nëse vendoset shtyrja e seancës, data të vendoset sa më shpejt”, tha Dumani.
Në seancën e sotme pritej të merrej një vendim mbi kërkesën e mbrojtjes për gjykim të veçuar të të pandehurve të tjerë, kërkesë e depozituar më 3 prill.
Gjykata vendosi shtyrjen e seancës për në datën 27 prill, në orën 12:00.