Kryetari i Partisë Demokratike Sali Berisha deklaroi se opozita do të votojë kundër draftit të Partisë Socialiste për referendumet.
Në një konferencë për mediat, kryedemokrati u shpreh se ky është një tjetër hap i kryeministrit Edi Rama për të mbuluar vjedhjet e tij.
“Nuk votojmë asnjë ligj me PS. Jemi të angazhuar në proceset e reformës, në dy reforma. Jo se besojmë se Edi Rama do të pranojë të ketë një produkt të përbashkët, jemi të bindur se nuk beson. Por kemi një opinion të tërë që kërkon që të ne të paraqesim variantin tonë dhe ata të njihen më të. Por të votojmë në mënyrë të njënjëshme ligjet e PS, kjo s’ndodh! Edi Rama përpiqet që me shashka të mbulojë vjedhjet, jo!. Ai vjedh në ditë shumëfishin e rrogave të Parlamentit dhe të zyrtarëve të tij, është hipokrizi e madhe!”, tha Berisha.
Kryeopozitari preku dhe çështjen e rritjes së çmimit të naftës, duke bërë përgjegjëse qeverinë që sipas tij nuk frenoi abuzimet me çmimet.
“Asnjë litër naftë nuk hyn në Shqipëri me bote, 350 mijë ton kontrabandë hyjnë në portet që kontrollon qeveria. 350 mijë ton naftë kontrabandë janë të barabarta me 410 mln euro që shkojnë në familjen e kryekontrollorit që është Rama. Rama preferon që ajo rezervë të mbahet duke tatuar më rëndë naftën që iu shitet qytetarëve”, shtoi Berisha.
Lideri i opozitës u shpreh se PD ka gati paketën me programin e saj që vendos mbi naftën të njëjtën ngarkesë fiskale, si në Maqedoninë e Veriut dhe në Kosovë./vizionplus.tv