Shkupi Nikoqir i Forumit Rajonal Kundër Korrupsionit: Fetai Kërkon Rezultate të Matshme dhe Bashkëpunim më të Fortë në Ballkan

Në kuadër të Ditës Ndërkombëtare Kundër Korrupsionit, në Shkup u zhvillua Forumi Rajonal
“Nga politika në ndikim: avancimi i integritetit dhe reformave institucionale në Ballkanin
Perëndimor”, nën organizimin e Qeverisë së Republikës së Maqedonisë së Veriut, në partneritet
me Suedinë, Zvicrën, Bashkimin Evropian dhe UNOPS.
Forumin e hapi Zëvendëskryeministri për Qeverisje të Mirë, Arben Fetai, i cili theksoi se
lufta kundër korrupsionit duhet të jetë politikë e qëndrueshme shtetërore dhe standard
evropian, e mbështetur në rezultate konkrete dhe jo në premtime. Në fjalën e tij, Fetai kujtoi
zotimin e Qeverisë për ta trajtuar integritetin institucional si prioritet afatgjatë, duke theksuar se
qytetarët presin prova të dukshme të sundimit të ligjit, rikuperim të pasurisë së përvetësuar dhe
sisteme digjitale që e bëjnë korrupsionin pothuajse të pamundur.
Evenimenti mblodhi në Shkup ministra të drejtësisë dhe drejtues institucionesh nga vendet e
Ballkanit Perëndimor, si dhe përfaqësues të shoqërisë civile, medias dhe organizatave
ndërkombëtare. Gjatë forumit do te realizohen katër sesione të fokusuara në thellimin e
bashkëpunimit rajonal, forcimin e mekanizmave të llogaridhënies, shfrytëzimin e teknologjisë
dhe inteligjencës artificiale në luftën kundër korrupsionit, si dhe rolin që shoqëria civile dhe
media hulumtuese kanë në transparencën e financave publike dhe zbulimin e keqpërdorimeve.
Nëpërmjet diskutimeve në kuadër të forumit theksi do te bie në bashkëpunim më të efektshëm
ndërkufitar, shkëmbim të inteligjencës financiare në kohë reale, standarde të përbashkëta për
matjen e rezultateve antikorrupsion, si dhe krijimin e platformave të hapura të të dhënave që
rrisin transparencën dhe përfshirjen qytetare. Gjithashtu, rëndësia e mbështetjes së medias
hulumtuese dhe mbrojtjes së sinjalizuesve si faktor kyç për parandalimin e korrupsionit janë
tema që do të shtjellohen gjatë këtijë forumi.
Në përmbyllje të evenimentit do te miratohet Deklarata e Shkupit, një dokument me angazhime
të matshme për integritet, transparencë dhe bashkëpunim rajonal.
Fetai theksoi se kjo nismë do të shndërrohet në platformë vjetore ku vendet e rajonit do të
raportojnë progresin dhe do të dakordojnë hapa të përbashkët për vitin vijues.