Sipas dosjes gjyqësore të siguruar nga mediat, dalin në pah detaje tronditëse për Astrit Isufin – personin e dyshuar për vrasjen e dy vëllezërve në fshatin Gollubovc të Malishevës. Dokumentet e gjykatës përshkruajnë një histori të përsëritur dhune ndaj bashkëshortes së tij.
Në dosje thuhet se më 30 mars 2025, gjatë ditës së Bajramit, Astrit Isufi e kishte sulmuar gruan e tij në dy raste të ndryshme. Fillimisht, ai e kishte goditur me shuplakë e grushte, pasi ajo nuk kishte arritur t’i zgjonte fëmijët nga gjumi. Në përshkrimin e dosjes theksohet se gruaja ishte rrahur në fytyrë dhe trup pa asnjë arsye të arsyeshme.
Më vonë gjatë ditës, pas kthimit nga vizitat tek familjarët, tensionet ishin rritur sërish. Siç përshkruhet në dokument, Isufi ishte zemëruar kur kishte mësuar se mungonte një produkt ushqimor dhe kishte hedhur pjatat në dysheme. Më pas, e kishte tërhequr zvarrë bashkëshorten në një dhomë dhe e kishte goditur disa herë me një kabllo rryme.
Ngjarjen e kishte parë edhe vajza e tyre, e cila kishte ndërhyrë duke i kërkuar të atit të ndalonte “sepse po e mbyste nënën”. Pavarësisht kësaj, sipas dosjes, ai kishte vazhduar dhunën deri sa kishte konsideruar se “mjaftonte”.
Në të njëjtën ditë, siç raportohet në dosje, Isufi e kishte kërcënuar bashkëshorten se nëse do të ndahej prej tij “do t’ia vriste gjithë familjen”. Këto kërcënime e kishin lënë gruan në gjendje të rënduar psikologjike, me ankth dhe frikë për jetën.
Për veprat e dhunës në familje, Gjykata në Prishtinë – Dega në Drenas, e kishte dënuar më parë Astrit Isufin me 154 ditë burgim dhe 300 euro gjobë, ndërsa për kanosje ishte gjobitur me 500 euro.