Kryesuesi i seancës konstituive të Kuvendit të Kosovës, Avni Dehari, ka reaguar përmes një postimi në Facebook lidhur me debatet procedurale që po e përcjellin bllokimin e konstituimit të Kuvendit, duke theksuar se votimi i fshehtë është i lejuar dhe nuk përbën shkelje të Kushtetutës.
Duke iu referuar Aktgjykimit të Gjykatës Kushtetuese të vitit 2014, Dehari citon pikën 178 të tij, ku thuhet se “as Kushtetuta, as Rregullorja e Kuvendit nuk përcaktojnë nëse votimi në seancën konstituive duhet të jetë i hapur apo i fshehtë” dhe se “në këtë seancë nuk vlejnë mocionet procedurale”.
Sipas Deharit, kjo do të thotë se nuk ka bazë që deputetët të pyeten për mënyrën e votimit, pasi një veprim i tillë do të përbënte shkelje të aktgjykimit.
“Lidhur me propozimin e Lëvizjes Vetëvendosje për kryetar të Kuvendit, kanë dështuar gjashtë votime të hapura. Si kryesues, kam propozuar votimin e fshehtë në përputhje me aktgjykimin, me qëllim të tejkalimit të bllokadës institucionale”, shkroi Dehari.
Ai theksoi se mënyra e votimit – e hapur apo e fshehtë – ka peshë të barabartë ligjore dhe se vota e deputetëve për krijimin e komisionit për votim të fshehtë është shprehje e vullnetit të tyre për ta realizuar një të drejtë kushtetuese.
Sipas tij, “refuzimi i deputetëve për të votuar komisionin për votim të fshehtë është refuzim për të realizuar një të drejtë që e garanton Kushtetuta”./Telegrafi/