Maqedonia e Veriut dhe tërë Ballkani Perëndimor duhet ta shfrytëzojë momentin pozitiv për të ecur përpara në rrugën e integrimit në Bashkimin Evropian. Kjo është porosia e ambasadorit të BE-së në Shkup, David Geer.
“Kuptohet që liderët e qeverive, liderët e 27 vendeve anëtare të Bashkimit Evropian në fakt pas zgjedhjeve evropiane treguan angazhim se vizioni i tyre strategjik në pesë vitet e ardhshme do të jetë edhe procesi i zgjerimit. Kështu që, mund të them se procesi i zgjerimit mbetet prioritet kryesor gjithashtu edhe për strukturën e ardhshme të institucioneve evropiane. Kështu që, nuk shoh këtu kurrfarë ndryshimi.
Çështja e vetme që mund ta shtoj është se në këtë moment me të vërtetë ekziston moment i madh dhe mundësi e madhe që të mundet Maqedonia e Veriut ta shfrytëzojë në kontekst të zgjerimit të Bashkimit Evropian”, tha David Geer, ambasador i BE-së në Shkup
Ndryshe, qytetarët e 27 vendeve anëtare të BE-së, prej 6 deri më 9 qershor votuan për të zgjedhur përfaqësuesit e tyre në Parlamentin Evropian për një mandat pesëvjeçar. Ndonëse në këto zgjedhje është vërejtur rritje e ndjeshme e partive të së djathtës ekstreme, partitë tradicionale të qendrës së djathtë dhe majtë, Partia Popullore Evropiane dhe Social-Demokratët janë renditur në vendin e parë dhe të dytë./Alsat/