Kolapsi i bankës më të rëndësishme amerikane Silicon Valley solli një sërë pikëpyetjesh për të ardhmen ekonomike në SHBA dhe botë.
Lidhur me një krizë financiare të mundshme presidenti amerikan Joe Biden tha se administrata e tij po bën gjithçka që duhet për të rregulluar krizën bankare. Ai deklaroi se po punohet me autoritetet duke theksuar se nismat e Shtëpisë së Bardhë për këtë çështje nuk ka përfunduar ende.
“Unë bëra atë që duhej të bënim. Besoj se gjërat do të funksionojnë. Tregu duket se po i përgjigjet hapave që kemi marrë. Nëse pyetemi nëse hapat që do të ndërmarrim për të lehtësuar tensionin në sektorin bankar kanë mbaruar, nuk kanë mbaruar ende. Ne po monitorojmë nga afër situatën. Mendoj se e kanë trajtuar mirë deri tani. Mendoj se duhet t’i lëmë gjërat të ecin siç duhet,” tha Biden.
Biden bëri me dije se ekipi i tij po punon për t’iu përgjigjur krizës në sektorin bankar duke bërë ndryshime në ligj. Por, ai thekson se kjo mund të jetë e vështirë për shkak të ndarjes në Kongres.
“Nuk jam shumë i sigurt nëse mund të bëhen ndryshime ligjore. Por ne po e shqyrtojmë gjithashtu këtë çështje,” tha Biden.
Silicon Valley Banks u mbyll më 10 mars, pasi klientët tërhoqën 42 miliardë dollarë në një ditë të vetme. Ishte dështimi i dytë më i madh i bankës në historinë e SHBA-së, pas Washington Mutual në 2008. FDIC ra dakord të garantonte të gjitha depozitat, duke përfshirë ato mbi 250,000 dollarë për llogari që zakonisht janë të siguruara.