Subscribe
Pas Vlorës, edhe Tirana do të ketë një muze dedikuar historisë, traditës dhe kulturës së hebrenjve gjatë luftës së dytë botërore. I quajtur muzeu “Besa” në nder të besës që shqiptarët i dhanë këtij populli, ky institucion hap dyert për konkursin për projekt ide, ku do të tërhiqen ekipe ndërkombëtare dhe kombëtare projektuesish arkitektë, restauratorë, pejsazhistë, kurator, etj.
EDI RAMA
KRYEMINISTER I SHQIPËRISË
“Është një vend ku siç tregon i gjithë dokumentacioni historik, banorët nuk dorëzuan asnjë hebre të vetëm tek nazistët. Shqipëria falë kësaj historie të shkruar nga njerëzit e saj është pagëzur me titullin e drejtë mes vendeve, The Righteous Among the Nations. Ashtu sikundër shumë shqiptarë janë pagëzuar të tillë nga shteti i Izraelit dhe historia e shpëtimit të hebrenjve në Shqipëri është pjesë e koleksionit të tmerrit dhe të lavdisë së sakrificës njerëzore në Yad Vashem. Më vjen shumë mirë që e shpallim sot këtë konkurs, me të gjitha kushtet për të pasur arkitekt dhe studio prestigjioze, siç faktikisht na ka ndodhur me konkurset tona ndërkombëtare.”
Muzeu do të ngrihet në godinën e njohur si shtëpia e Libohovitëve, monument kulture, që ndodhet në krah të Kalasë së Tiranës dhe Sarjaeve të Toptanëve. Ndaj ky destinacion turistik por dhe kulturor do të jetë një portë e re e kryeqytetit për vendasit por dhe të huajt.
Konkursi për muzeun “Besa” do të zhvillohet në dy faza. Në fazën e parë të aplikimit, kandidatët do të paraqesin përbërjen e ekipeve, kualifikimet, metodologjinë e punës, duke përfshirë një koncept paraprak. Ndërsa në fazën e dytë, juria do të shqyrtojë propozimet e 5 ekipeve të përzgjedhura.